பரவுக நின்கருணை! (கவிதை)

-பத்மன்

பத்துத் தலைகளைப் பற்றித் திருகிட 

    பறந்தது நின்கணையே
பற்றுத் தளைகளை வெட்டி அறுத்திட 

    பரவுக நின்கருணை! 1

 
முன்னை முப்புரம் முக்கட் கொண்டே 

     எரித்தது நின்சிரிப்பே
முன்னை வினைகளின் மும்மலம் ஒழித்து 

    முடிப்பது நின்சிறப்பே! 2

கடலுள் புகுந்த சூர்மா தடிந்தது 

    சுடர்மிகு நின்வேலே
உடலுள் புகுந்த உயிரது கதிபெறச் 

    செய்வது நின்தாளே! 3

எருமைத் தலையன் கொடுமை முடித்திட 

    எறிந்தது நின்சூலம்!
அருமை எங்கள் வாழ்வில் உற்றிட 

    அருளுக நின்பாலம்! 4

காண்க: பத்மன்